Rückblick Seniorenferien 2022

Seniorenferien Sion / 11. - 17.06.2022

Drü Johr hämmer müesse uf Seniore Ferie warte
jetzt chönned mir am Samstig am Morge by schönstem Sonneschy starte
mir sind zwar nur e chlini Schar
aber en guete Chauffeur und en grosse Car
wo eus sicher is Wallis chauffiert
wäge Stau Richtig Gotthard echli Zyt verlürt
aber nach Göschene Andermatt Richtig Furka Pass
macht die Fahrt eus würklich Spass
mir chönd ganzi Häng voll Alperose gseh
uf de Pass Höchi hets no Fläcke mit Schnee
via Ulrichen Fiesch treffed mir in Leuk Stadt a
mit viel Verspötig, aber mir gniessed de Teller voll Cholera
bis zu eusem Ferie Ziel isch es jetzt nümme wyt
in Sion beziehnd mir eusi Zimmer im Hotel Elite
d›Maria het es schöns Programm zäme gstellt
und Monica Cusinato het sich zur Verfüegig gstellt
eus die erschte paar Täg by stoh
mir sind da defür glücklich und froh
und gänd eus Müeh, dass sie mit eus Alte
es paar Täg im Wallis wird ushalte.
Am Sonntig am Morge gmüetlich dur d›Altstadt spaziere
isch ganz anders als by eus in Schliere
denn keini Auto und Tram oder Büs dörfed do fahre
die Strasse tüend elei de Fuessgänger ghöre.
einigi tüend zur Chile uf Valere styge
aber ganz gmüetlich, nid übertriebe
d›Chile isch leider scho übervoll
aber de Blick is Rhonetal isch wundervoll.
Am Nachmittag nach eme Lunch im Zenhäusern Café
chönned mir viel Interessants über Sion vernäh
der Füerer weiss viel Spannends brichte
über sini Stadt und ihri Gschichte.
Zobe tüemmer de Pater Varghese am Bahnhof abhole
er fyret mit eus Mäss i de
Sacre Coeur Chile
d›Monica Cusinato tuet ihn understütze
jetzt tüend mir de Rest vom Obe derzue benütze
in ere schöne Gartewirtschaft es feins Aesse gniesse
mit eme feine Dessert eusi Ferie versüesse.
Am Mäntig am Morge wänd mir mit em Zug nach St. Leonard fahre
doch am Bahnhof müend mir erfahre
d›Strecki isch underbroche, alli Züg falled us
zum Glück chont d›Maria mit de franz. Sprach drus
mit Taxi und Ersatzbus findet alli de Wäg zu dem See
uf ere Schifffahrt chönd mir die Naturschönheit gseh
nach eme Imbiss im Restaurant isch d›Strecki wieder frei
und ohni Umtrieb fahred mir mit em Zug wieder hei.
Will i der Stadt keini Auto fahre
chönneds eus vor em Hotel ganz ohni Gfahre
fascht zmitzt uf de Stross s›Nachtesse serviere
mach das emol by eus in Schliere
nachher nochli gmüetlich bummle i der Stadt
mer chönnt jo nid eso früeh is Bett
am TV verusse luege, wie›s eusere Fuessball--Nati goht
und warte bis de Vollmond hinder de Berge ufgoht
Au wenn me St. Maurice scho mol gseh het
isch die Chile und Abtei en Bsuech wert
do tuet eus d›Monica verloh, sie muess hei go schaffe
defür isch s›Heidi Berri i--troffe
sie tuet eus die restliche Täg betreue
mir tüend eus jetzt aber uf die Füerig freue
bsueched Basilika, de Chrüzgang, die archäologische Stätt
bsueched Basilika, de Chrüzgang, die archäologische Stätt
de Stiftsschatz mit sagehaftem Wert
nachher gits no Stifts--Wy zu degustiere
drü verschiedeni Sorte chönned mir probiere
im ene chinesische Restaurant tüend mir eus nachher verpfläge
in ere churze Besinnig i de Chile git de Pater eus de Säge
einigi fahred jetzt zrugg is Hotel
d›Fee--Grotte cha mer bsueche, wenn mer will
ich schliess mich dere Gruppe a
nach eme steile Ufstieg chömed mir by der Grotte a
nach 1000 Meter im Fels inne spaziere
so Höhle tüend eim fasziniere
chont en grosse Wasserfall und en See
aber die Fee hämmer leider nid gseh
am Abig werdet mir mit eme feine Apero verwöhnt
für de Hubert «Happy Birthday» ertönt
alles Gueti Hubert zu dim Fäscht
mir alli wünsched dir numme s›Bescht
Am Mittwoch gohts nach Grand Dixence
mir fahred mit dem Car dur s›Val Hérémence›
en Seilbahn bringt eus ganz ufe uf d›Staumuur
es isch würklich imposant, mir stuuned nur
was die Ingenieure und Baulüt fertig brocht händ
wie dick sind jetzt wieder die Betonwänd?
Wer will, cha nachher die Muur aluege vo inne
mir andere tüend eus i der nahe Kapelle besinne
Bergblueme betrachte, die gueti Alpeluft gspüre
bevor mir wieder nach Sion zrugg fahre
i der Chile vo Hérémence mached mir en churze Halt
ich weiss nid, wem de Betonklotz gfallt
Im Wallis heisst Fronleichnam «Fete de Dieu»
wenn mir scho da sind, wämmer de Gottesdienst würklich gseh
d›Mäss findet statt vor der Kathedrale
d›Sunne tuet chräftig vom Himmel strahle
mir chönd im Schatte stoh und mit--fyre
de Pater Varghese dörf au zu de Priester ghöre
wo de Gottesdienst tüend mitgestalte
so öppis erläbt er sicher ganz sälte
a der a--schliesssende Prozession dörf er au teil näh
do gits viel Prominenz us em Wallis z›gseh
vo Behörde, Militär und andere Delegatione
Fraue mit ihre Trachte, dene Schöne
underem Himmel tuet de Bischof d›Monstranz mitträge
und erteilt underwägs demit de Säge
d›Musig dörf natürlich au nid fehle
au Delegatione von Verein mit de Fähne
mached die Prozession festlich und schön
mir sind be--idruckt vo dem Alass in Sion
jetzt chönned mir en Erfrüschig brucheuche
mir tüend nomol s›Cafe Zenhäusern bsueche
am Nachmittag fahred mir mit em Bus nach Les Illes
es cha mitcho zu dem See wer will
mir sind überrascht vo dere schöne Freizyt--Alag
do möcht mers verlyde en ganze Tag
eus längts aber nur zum Glace ässe
mir müend gly zrugg zu eusem letschte Nachtässeend
denn morn gönd mir scho wieder hei
und die Meischte vo eus sind denn wieder elei
aber mir händ schöni Ferie im Wallis dörfe verbringe
drum möcht ich au de Dank abringe
em Pater Varghese, er het eus geistig betreut
das het eus alli bsunders gfreut
de Maria und em Heidi für›s Organisiere
mir freued eus uf die nächste Senioreferie mit de Pfarrei Schliere
uf de Heifahrt über de Furka hämmer wieder lang im Car müesse sitze
mir händ aber underwägs Glägeheit chönne benütze
zur Eisgrotte im Rhonegletscher abestiege,die lyt wyt unde
und de Gletscher isch zum ene grosse Teil verschwunde
Zobe chömed mir alli glücklich und froh wieder in Schliere a
schöni Ferie hämmer in Sion gha.

Helen Adler